Պաշտոնական այցով ԱՄՆ-ում գտնվող Լիբանանի նախագահ Ժոզեֆ Աունի գլխավորած պատվիրակությունը մասնակցել է Վաշինգտոնում Լիբանանի դեսպանատան կազմակերպած ընթրիքին: Մասնակցել են Կոնգրեսի մի շարք անդամներ և ԱՄՆ վարչակազմի պաշտոնյաներ։
Ելույթի ժամանակ Լիբանանի նախագահն ընդգծել է. «Լիբանանը չի կարող անվտանգ կամ միասնական լինել, եթե այն միասնական պետություն չէ՝ միասնական բանակով, որը պաշտպանում է բոլոր լիբանանցիներին՝ առանց խտրականության»։
Ժոզեֆ Աունն անդրադարձել է նաև «Հըզբոլլահի» խնդրին: Նրա համոզմամբ՝ խմբավորման զինաթափումը հնարավոր է միայն մի քանի պայմանով՝ «օկուպացիայի» ավարտ (իսրայելական զորքերի դուրսբերում), տարածքների լիակատար վերահսկողության փոխանցում Լիբանանի բանակին և վերականգնման ծրագրի իրականացում, որը բացառապես կառավարելու է պետությունը։
Ընթրիքին ներկա դեսպան Նադա Մոավադը նշել է, որ այս այցն արտացոլում է Բեյրութի հանձնառությունը՝ ամրապնդել Միացյալ Նահանգների և Լիբանանի միջև պատմական հարաբերությունները ու աշխատել իրականացնելու «լիբանանցի ժողովրդի ձգտումները»՝ ինքնիշխանության, տարածքային ամբողջականության ու անվտանգության հարցում։