Դեկտեմբերի 6-7-ը Հարավային Կորեայի խորհրդարանը պետք է քվեարկի նախագահ Յուն Սոկ Յոլի իմփիչմենթի օրինագիծը։ Այն ընդունելու համար խորհրդարանում պահանջվում է 300 ձայնից 200-ը, այդ առումով ընդդիմությունը պետք է ստանա իշխող կուսակցության առնվազն 18 պատգամավորի աջակցությունը, հաղորդում է Yonhap գործակալությունը:
Եթե իմփիչմենթը հաստատվի, նախագահը կհեռացվի պաշտոնից՝ մինչև Սահմանադրական դատարանի որոշումը։
Երեքշաբթի լույս չորեքշաբթի գիշերը Հարավային Կորեայի նախագահ Յուն Սոկ Յոլը հայտարարել է ռազմական դրություն մտցնելու մասին՝ «հյուսիսկորեական ուժերից երկիրը մաքրելու և լիբերալ սահմանադրական կարգը պահպանելու համար»։ Նրա խոսքով՝ հարավկորեական ընդդիմության փորձերը՝ իմփիչմենթի ենթարկելու մի շարք բարձրաստիճան պաշտոնյաների, սպառնում են կաթվածահար անել իշխանությունը։ Հարավային Կորեայի խորհրդարանը քվեարկել է ռազմական դրությունը դադարեցնելու օգտին, և նախագահն ընդունել է որոշումը։