Օգոստոսի 21-ին խոշոր ավտովթար-հրդեհ է տեղի ունեցել Շիրակի մարզում:
Ժամը 16:50-ի սահմաններում BMW մակնիշի ավտոմեքենան Սարալանջ-Արթիկ ավտոճանապարհի Հառիճ գյուղի վարչական տարածքում դուրս է եկել հանդիպակաց երթևեկելի գոտի, ապա բախվել հողաթմբերին ու քարերին և կողաշրջված վիճակում հայտնվել արհեստական լճակի ափի մոտ, հայտնում է Shamshyan.com-ը։
Բախման հետևանքով ավտոմեքենայում հրդեհ է բռնկվել, վթար-հրդեհի հետևանքով վարորդն ու ուղևորը, որոնց առաջինը օգնության են հասել քաղաքացիները և հրշեջ-փրկարարական ջոկատի փրկարարները, տեղափոխվել են Գյումրու բժշկական կենտրոն:
Բժիշկները վիրավորներին միչև հիվանդանոց տեղափոխելը տեղում անհրաժեշտ բուժօգնություն են ցուցաբերել:
Հրշեջ-փրկարարներն այնուհետև մարել են ավտոմեքենայում և դրան հարակից տարածքում առաջացած կրակը, սակայն ավտոմեքենան ամբողջությամբ վերածվել է մոխրակույտի:
Վթարի փաստով Քննչական բաժնում նախաձեռնվել է քրեական վարույթ, որտեղ էլ պարզվում են ավտոմեքենայի սեփականատիրոջ, վարորդի և վիրավորների ինքնությունները:
Քննիչի հանձնարարականով՝ ավտոմեքենան տեղափոխվում է ոստիկանության Արթիկի բաժնի պահպանվող հատուկ տարածք: