Աշխարհի ներկայիս իրավիճակը, երբ ամեն ինչ շատ արագ է փոխվում, պահանջում է պատրաստ լինել ամեն ինչի՝ «Վալդայ» ֆորումի լիագումար նստաշրջանում հայտարարել է ՌԴ նախագահ Վլադիմիր Պուտինը:
«Մենք բազմիցս նշել ենք, որ ապրում ենք մի ժամանակաշրջանում, երբ ամեն ինչ շատ արագ է փոխվում։ Ես կասեի՝ կտրուկ փոխվում է։ Պատմության նման ժամանակահատվածներում յուրաքանչյուրի պատասխանատվությունը հատկապես մեծ է. և՛ սեփական ճակատագրի, և՛ երկրի և ամբողջ աշխարհի համար: Եվ խաղադրույքներն այստեղ չափազանց բարձր են»,- ասել է Պուտինը:
Նրա խոսքով՝ համաշխարհային հավասարակշռությունն առանց Ռուսաստանի չի կարող կառուցվել: Ուկրաինայում իրավիճակն էլ, Պուտինի խոսքով, Արևմուտքն օգտագործում է սեփական խնդիրները լուծելու, պատերազմից գումար վաստակելու համար:
ՌԴ նախագահն անհեթեթություն է անվանել Ռուսաստանի հետ հնարավոր պատերազմի մասին եվրոպացի քաղաքական գործիչների հայտարարությունները: Նա կոչ է արել եվրոպական քաղաքական գործիչներին՝ «չանհանգստանալ»: ️
Միևնույն ժամանակ, Պուտինի խոսքով՝ Մոսկվան ուշադիր հետևում է Եվրոպայի ռազմականացմանը: