Այսօր Կրեմենչուկում տեղի է ունեցել հայ և ուկրաինացի ժողովուրդների անմեղ զոհերի հիշատակին նվիրված խաչքարի բացման և հայկական եկեղեցու հիմնաքարի օծման հանդիսավոր արարողությունը, որին մասնակցել է դեսպանության երկրորդ քարտուղար Հայկ Թորոսյանը։ Այս մասին տեղեկացնում են Ուկրաինայում ՀՀ դեսպանությունից։
Միջոցառմանը մասնակցել և ողջույնի խոսքով հանդես են եկել ՀԱԵ Ուկրաինայի թեմի առաջնորդ Մարկոս Եպիսկոպոս Հովհաննիսյանը, Կրեմենչուկի քաղաքապետ Վիտալի Մալեցկին, «Ուկրաինայի ազգային համայնքների խորհուրդ» հասարակական կազմակերպության ղեկավար Աշոտ Ավանեսյանը, տեղի հայ համայնքի ներկայացուցիչներ։
Իր ելույթում Հայկ Թորոսյանը, մասնավորապես նշել է, որ միջոցառումը տեղի է ունենում այն ժամանակաշրջանում, երբ երկու ժողովուրդներն էլ կանգնած են անվտանգության լուրջ մարտահրավերների առաջ։
Կրեմենչուկի հայ համայնքի այս գեղեցիկ նախաձեռնությունը վկայում է տեղի հայության միասնականության և տեղական իշխանությունների հետ արդյունավետ համագործակցության և Ուկրաինայի ապագայի նկատմամբ վստահության մասին։