Վրաստանի Սամցխե-Ջավախքի մարզի Կարծախ կամ Կարզախ հայաբնակ գյուղը Խոզապին լճից արեւմուտք գտնվող գյուղերից մեկն է՝ վրաց-թուրքական սահմանի վերջին գյուղը: 1800-ականներին հայերը Էրզրումից գաղթել ու հաստատվել են այստեղ՝ զբաղվելով անասնապահությամբ ու հացահատիկի մշակությամբ: Սար ու ձորերի արանքներում ու Ջավախքին բնորոշ բնության գրկում բազմաթիվ հայաբնակ գյուղերից մեկում՝ Կարծախում էլ շարունակում են ապրել ու արարել՝ պահպանելով հայկականը, մտածելով, սովորելով ու հավատալով հայերեն, պահպանելով հայկական մշակույթը: