Ամբողջ աշխարհում մարդիկ անհրաժեշտ միջոցներ են ձեռնարկում իրենց եւ իրենց ընտանիքներին նոր տեսակի կորոնավիրուսից պաշտպանելու, ինչպես նաեւ համավարակի տարածումը կանխարգելելու համար:
Մասնագետները փաստում են, որ համաճարակային իրավիճակը հաղթահարելու միակ արդյունավետ միջոցը զանգվածային պատվաստումներն են:
Խորհրդարանում իրականացվեց պատվաստումների հերթական փուլը: Պատվաստվողների շարքում են եւ՛ պատգամավորներ, եւ՛ աշխատակազմի ներկայացուցիչներ:
Պատվաստումից առաջ բոլորը ստուգվում են բժիշկների կողմից, իսկ ներարկումն իրականացնելուց հետո տրվում են հետպատվաստումային ցուցումներ:
Լրացնելով համապատասխան թերթիկը՝ յուրաքանչյուրին ներարկվում է իր նախընտրած պատվաստանյութի տեսակը: Պատվաստվողները ստանում են պատվաստանյութի առաջին դեղաչափը: Պատվաստվողները համոզված են՝ իրենց այս քայլով կանխում են վարակի շղթայի ընդլայնումը եւ հոգ տանում իրենց մերձավորների առողջության մասին: «Լավագույն բուժումը կանխարգելումն է, ուստի պատվաստվե՛ք»,-հորդորում են եւ՛ պատգամավորները, եւ՛ ԱԺ աշխատակիցները: