Միջխորհրդարանական միության 150-րդ վեհաժողովի շրջանակում ելույթ է ունեցել ՀՀ ԱԺ նախագահի տեղակալ Հակոբ Արշակյանը:
«Տիկին նախագահ,
Ձերդ գերազանցություններ,
Հարգելի՛ խորհրդարանականներ, տիկնա՛յք և պարոնա՛յք,
Առաջին հերթին ցանկանում եմ շնորհակալություն հայտնել Ուզբեկստանի մեր ընկերներին հյուրընկալության բարձր մակարդակի համար գեղեցիկ քաղաք Տաշքենդում:
Այսօր Հայաստանում նշվում է Մայրերի և կանանց ազգային օրը, և ես ցանկանում եմ շնորհավորել այս դահլիճում ներկա բոլոր կանանց, մաղթել բոլորիդ խաղաղություն ու բարգավաճում:
Ինձ համար մեծ պատիվ է այսօր ելույթ ունենալ ձեր առջև այս կարևոր պահին, երբ մենք միասին աշխատում ենք ավելի արդար, խաղաղ և բարեկեցիկ աշխարհ կառուցելու ուղղությամբ:
Հավաքվելով Միջխորհրդարանական միության 150-րդ վեհաժողովում՝ մենք միասնական ենք լուծելու այն հրատապ խնդիրները, որոնց բախվում ենք: Ամբողջ աշխարհում մենք բախվում ենք բարդ խնդիրների, որոնք սպառնում են մեր ապագային, եթե անգործության մատնվենք:
Մենք հավաքվել ենք այստեղ՝ մասնակցելու կարևոր քննարկումներին այն ապագայի վերաբերյալ, որը մենք ցանկանում ենք կառուցել. ապագա, որը հիմնված է արդարության, հավասարության եւ, առաջին հերթին, խաղաղության վրա:
Հայաստանը հավատում է, որ իրական զարգացումն ավելին է, քան տնտեսական աճը: Մենք քննարկում ենք ստեղծել այնպիսի համակարգեր, որոնք քաղաքացիների համար կապահովեն սոցիալական պաշտպանություն, հավասար հնարավորություններ և արժանապատվություն:
Հայաստանում մենք քրտնաջան աշխատում ենք բնակչության խոցելի խմբերի կարիքները բավարարելու ուղղությամբ՝ ձգտելով, որ առողջապահությունը, կրթությունը և ապահովված լինելը ոչ թե արտոնություն լինեն քչերի համար, այլ իրավունքներ բոլորի համար:
Մենք նաև կենտրոնանում ենք սոցիալական ներառականության վրա՝ հոգ տանելով, որ բոլորը՝ անկախ սեռից, էթնիկ պատկանելությունից կամ ծագումից, հնարավորությունների հասանելիություն ունենան: 2024 թվականի համեմատ 2025 թվականին Հայաստանը 14,9 տոկոսով ավելացրել է սոցիալական պաշտպանության ծախսերը:
Նման գործողությունների միջոցով է, որ մենք ամրապնդում ենք ժողովրդավարությունը, կառուցում ենք ավելի ամուր հասարակություն:
Հայաստանում մենք գիտենք, որ խաղաղության հաստատումը երկար և երբեմն դժվար գործընթաց է, որի համար արդարացված են բոլոր ջանքերը:
Այս ոգով մենք վերջերս զգալի քայլ կատարեցինք:
Հայաստանը հաստատում է, որ Ադրբեջանի հետ խաղաղության համաձայնագրի նախագիծը հավանության է արժանացել, և բանակցությունները հաջողությամբ ավարտվել են: Խաղաղության համաձայնագիրն այժմ պատրաստ է ստորագրման, և Հայաստանը պատրաստ է ավարտին հասցնել այդ պատմական քայլը:
Մենք հրավիրում ենք Ադրբեջանին միանալ մեզ՝ մեր երկու ժողովուրդների համար խաղաղ և բարգավաճ ապագայի ճանապարհին այս կարևոր քայլի իրականացման գործում:
Շնորհակալություն»,- նշել է ՀՀ ԱԺ նախագահի տեղակալը: