ԼՂ-ից բռնի տեղահանված անձանց կենսաթոշակի իրավունքի իրացման ընթացակարգերը կհստակեցվեն: Այդ մասին որոշումը Կառավարության նոյեմբերի 30-ի նիստին ներկայացրեց ԱՍՀ նախարարի տեղակալ Դավիթ Խաչատրյանը:
Ըստ այդմ՝ առաջարկվում է հաստատել առանձին ընթացակարգ, որով կսահմանվեն փախստականի կարգավիճակ ունեցող անձի՝ կենսաթոշակ նշանակելու համար դիմելու, այն նշանակելու, վերահաշվարկելու, կենսաթոշակի տեսակը փոխելու, կենսաթոշակ վճարելու և կենսաթոշակի գործ վարելու կարգի առանձնահատկությունները:
Օրինակ՝ սահմանվում է, որ փախստական ճանաչված անձը, որի կենսաթոշակի գործն առկա է ԼՂ կենսաթոշակային բազայում, կարող է կենսաթոշակ նշանակելու համար ներկայացնել առցանց դիմում մինչև 2024 թվականի հունիսի 1-ը: Ընդ որում՝ դիմումին որևէ փաստաթուղթ կցելու կարիք չկա: Համապատասխան փաստաթղթերի անհրաժեշտություն կա միայն այն դեպքում, երբ անձի հաշմանդամության ժամկետը լրացել է, և վերջինս ԼՂ-ում չի հասցրել անցնել բժշկասոցիալական փորձաքննություն կամ անցել է, բայց կենսաթոշակ ստանալու իրավունքը ԼՂ-ում չի իրացվել:
Կենսաթոշակ նշանակելու դիմումը մինչև 2024 թվականի հունիսի 1-ը ներկայացնելու դեպքում կենսաթոշակի իրավունքը չի վերանայվում, պահպանվում է ԼՂ-ի կենսաթոշակային բազայում հաշվարկված ու ներառված ստաժը, սակայն կենսաթոշակի չափը հաշվարկվում է ՀՀ-ում սահմանված օրենքի կարգով, իսկ կենսաթոշակը նշանակվում է կենսաթոշակի իրավունք ձեռք բերելու օրվանից, բայց 2023 թվականի հոկտեմբերի 1-ից ոչ շուտ:
«Նախագծով առաջարկում ենք սահմանել առանձին ընթացակարգով կենսաթոշակի նշանակման վերջնաժամկետ մինչև 2028 թվականի դեկտեմբերի 31-ը նշանակելու դեպքում, որով կենսաթոշակի իրավունքը չի վերանայվի: Մինչև 2028 թվականը եթե դիմի, սա նշանակում է, որ ստաժի վերահաշվարկ չի իրականացվի, սակայն 2028-ից հետո դիմելու դեպքում ՀՀ օրենսդրությամբ սահմանված կարգով կենսաթոշակի նշանակման գործընթաց տեղի կունենա»,- ասաց նախարարի տեղակալը և մանրամասնեց, որ եթե, օրինակ, անձի 63 տարեկանը սեպտեմբերի 15-ին է լրացել, և նա դիմել է 2023 թվականի դեկտեմբերին 11-ից հաշված եռամսյա ժամկետում, ապա նրան կենսաթոշակ կնշանակվի 2023 թվականի հոկտեմբերի 1-ից:
Անդրադառնալով առաջարկին՝ ՀՀ վարչապետ Նիկոլ Փաշինյանը նկատեց՝ 3 խումբ մարդկանց հետ գործ ունենք: Առաջին խմբում մարդիկ են, որոնք թոշակ էին ստանում ԼՂ-ում, նրանք առանց ընդհատման ՀՀ-ում թոշակ կստանան, այսինքն՝ հոկտեմբերի, նոյեմբերի թոշակները ևս կստանան առաջիկայում, և թոշակի կորուստ չեն ունենա:
Երկրորդ խմբում նրանք են, որոնք ԼՂ-ում սկսել էին կենսաթոշակ ստանալու գործընթացը, բայց ավարտին չեն հասցրել:
Երրորդ խմբում նրանք են, որոնց թոշակի տարիքը կամ թոշակի դիմելու ժամանակը լրացել է բռնի տեղահանման հետևանքով ՀՀ տեղափոխվելուց հետո:
«Կարգավորում ենք, ահա՛, նաև այս խմբի մարդկանց թոշակավորման գործընթացը՝ իհարկե, տեսադաշտում ունենալով, որ մի իքս պահից հատուկ կարգավորում չենք ունենալու, և ԼՂ-ից բռնի տեղահանված և ՀՀ քաղաքացի հանդիսացող շահառուներն արդեն նույն կարգով, սովորական ընթացակարգով կթոշակավորվեն»,- ասաց վարչապետը: