Իսրայելի պաշտպանության բանակի ռազմաօդային ուժերը հարվածել են Թեհրանում իրանական ցենտրիֆուգների արտադրության գործարանին և մի շարք այլ ռազմարդյունաբերական օբյեկտների։ Զինվորականները հայտնել են, որ հարձակման թիրախ են դարձել «երկիր-երկիր» դասի հրթիռների հավաքման համար հումք և բաղադրիչներ արտադրող արտադրամասը, ինչպես նաև օբյեկտներ, որոնք համակարգեր և բաղադրիչներ են արտադրում «երկիր-օդ» դասի հրթիռների համար՝ նախատեսված ինքնաթիռների խոցմանը, գրում է The Wall Street Journal-ը:

Իրանական լրատվամիջոցները հաղորդել են, որ Իսրայելն օդային հարվածներ է հասցրել Թեհրանի արևելքում գտնվող Իմամ Հուսեյնի ռազմական համալսարանին, որը, ըստ ենթադրության, կադրեր է պատրաստում Իսլամական հեղափոխության պահապանների կորպուսի համար:

Իսրայելը բազմիցս հարվածել է նաև Նաթանզի գործարանին և պնդում է, որ վնասել է դրա ստորգետնյա կառույցները, որտեղ, փորձագետների կարծիքով, պահվում է 10000 ցենտրիֆուգ, որոնք ուրանը հարստացնում են մինչև 60%:

Չնայած Իսրայելի վարչապետ Բենիամին Նեթանյահուն պնդել է, որ Իրանի միջուկային օբյեկտներին հասցված հարվածները երկար ժամանակով հետաձգել են այդ երկրի միջուկային ծրագիրը, Իսրայելը դեռ չի կարողացել հաջողությամբ հարվածել իրանական Ֆորդո օբյեկտին, որը գտնվում է լեռների խորքում, գրում է The Wall Street Journal-ը:

Ֆորդոն հարվածելու համար կպահանջվեն ԱՄՆ ռազմական միջամտություն և B-2 անտեսանելի ռմբակոծիչների տեղակայում՝ բունկերները պայթեցնող ռումբ նետելու համար՝ նշել է լրատվականը: