Վաշինգտոնում տեղի ունեցած ասուլիսի ընթացքում, ի թիվս այլ հարցերի, վարչապետ Նիկոլ Փաշինյանն անդրադարձել է նաև այն հարցին, թե Բաքուն արդյոք հստակեցրե՞լ է, թե ի՞նչ սահմաններով է ճանաչում Հայաստանի Հանրապետության տարածքային ամբողջականությունը և ե՞րբ է պատրաստվում իր զորքերը դուրս բերել Հայաստանի սուվերեն տարածքից։ Մեր երկրի ղեկավարն այս հարցին պատասխանեց՝ հղում անելով Վաշինգտոնում ստորագրված եռակողմ հռչակագրի 5-րդ կետին։
«Մենք ընդունում ենք անցյալի հակամարտությամբ չկանխորոշված, Միավորված ազգերի կազմակերպության կանոնադրությանն ու 1991 թվականի Ալմա-Աթայի հռչակագրին համապատասխան պայծառ ապագայի ուղի նախանշելու անհրաժեշտությունը։ Մարդկային անասելի տառապանքներ պատճառած հակամարտությունից հետո մեր ժողովուրդների համար ստեղծվել են վերջապես բարիդրացիական հարաբերություններ սկսելու պայմաններ՝ հիմնված միջազգային սահմանների անքակտելիության և տարածքներ ձեռք բերելու նպատակով ուժի կիրառման անթույլատրելիության սկզբունքների վրա։ Այս իրողությունը, որը ենթակա չէ և երբեք չպետք է ենթակա լինի վերանայման, ճանապարհ է հարթում մեր երկու ժողովուրդների միջև թշնամանքի էջը փակելու համար։ Մենք վճռականորեն մերժում և բացառում ենք վրեժխնդրության ցանկացած փորձ ներկայում և ապագայում»,- մեջ բերեց ՀՀ վարչապետը օգոստոսի 8-ին ստորագրված եռակողմ հռչակագրից՝ հիշեցնելով, որ 1991 թվականի Ալմա-Աթայի հռչակագրում նշվում է՝ Խորհրդային Հայաստանի տարածքը ճշգրիտ նույնական է անկախ Հայաստանի տարածքի հետ, և Խորհրդային Ադրբեջանի տարածքը ճշգրիտ նույնական՝ անկախ Ադրբեջանի տարածքի հետ։
Նիկոլ Փաշինյանի հավաստմամբ՝ հարցի լուծումը սահմանազատման գործընթացի շարունակությունն է։ Կա նաև երկրորդ տարբերակ՝ հանրաքվեն, որը, սակայն, ըստ վարչապետի, առավել բարդացնում է գործընթացը։