Միացյալ Նահանգները խոշոր ռազմական գործողություն է սկսել Իրանում՝ հայտարարել է ԱՄՆ նախագահը:
«Մի փոքր առաջ Միացյալ Նահանգների զինված ուժերը խոշոր ռազմական գործողություններ են սկսել Իրանում։ Մեր նպատակն է պաշտպանել ամերիկացի ժողովրդին՝ վերացնելով իրանական ռեժիմի անմիջական սպառնալիքները»,- ասել է Դոնալդ Թրամփը Truth սոցիալական էջում հրապարակված իր տեսաուղերձում:
Նրա խոսքով՝ Թեհրանը մերժել է իր միջուկային հավակնություններից հրաժարվելու յուրաքանչյուր հնարավորություն, և Վաշինգտոնը այլևս չի կարող հանդուրժել այն իրավիճակը, երբ Իրանը փորձում է վերափոխել միջուկային ծրագիրը և շարունակել զարգացնել հեռահար հրթիռներ:
Ավելի վաղ Թեհրանի կենտրոնական և այլ հատվածներում, Սպահանում, Ղոմում, Թավրիզում և այլ բնակավայրերում պայթյուններ են որոտացել, հաղորդվում է մի քանի տասնյակ օբյեկտների խոցման մասին:
Ըստ իրանական ԶԼՄ-ների՝ թիրախում են պետական և այլ կառույցների շենքերը, միջուկային կենտրոնները: Հաղորդվում է վիրավորների մասին: