«Դիմադրության» շարժման անդամները և նրանց համակիրները Ֆրանսիայի հրապարակից երթ են սկսել դեպի Հայաստանի արտաքին գործերի նախարարության շենք:
Երթի մեկնարկին կազմակերպիչները նշեցին, որ Հայաստանի իշխանությունը չունի լեգիտիմ իրավունք ժողովրդի անունից երկրի համար կարևորագույն հարցերում բանակցելու:
Նրանց խոսքով՝ այսօր Հայաստանում տեղի ունեցող միջազգային հանդիպումների ֆոնին գնում են ասելու, որ իշխանության հետ ձեռք բերված ցանկացած պայմանավորվածություն առոչինչ է, որովհետև իշխանությունը ժողովրդի անունից խոսելու մանդատ չունի:
Այս պահին երթի մասնակիցներն ԱԳՆ-ի շենքի մոտ են, որտեղ կուտակված են ոստիկանական ուժեր:
ՀՅԴ անդամ Իշխան Սաղաթելյանը լրագրողների հետ զրույցում նշեց, որ քիչ անց ելույթների միջոցով փոխանցելու են իրենց ասելիքը:
Հարցին՝ կփորձե՞ն ոստիկանական պատնեշը հաղթահարել՝ Սաղաթելյանն ասաց, որ իրենց նպատակն այսօր շենք շրջափակելը չէ, այլ իրենց ասելիքը տեղ հասցնելն է: Նրա խոսքով՝ Հայաստան այցելող ցանկացած պատվիրակություն պետք է ժողովրդի շունչը տեսնի և զգա: «Այն օրակարգը, որ մեր ժողովուրդը հրապարակում ներկայացրել է, բոլորը դա պետք է տեսնեն և իմանան»,- նշեց Սաղաթելյանը:
Հունիսի 8-ին Հայաստան է ժամանել ՌԴ արտաքին գործերի նախարար Սերգեյ Լավրովը, ով հունիսի 10-ին Երևանում կմասնակցի ՀԱՊԿ անդամ երկրների ԱԳ նախարարների խորհրդի նիստին: Հունիսի 9-ին ԱԳՆ-ում նախատեսված է Սերգեյ Լավրովի հանդիպումը ՀՀ արտաքին գործերի նախարար Արարատ Միրզոյանի հետ, որին կհաջորդի նախարարների մամուլի ասուլիսը: