Վրաստանի նախագահ Սալոմե Զուրաբիշվիլին հայտարարել է, որ մտադիր չէ հրաժարական տալ այն բանից հետո, երբ Սահմանադրական դատարանը վճռել է, որ նա խախտել է երկրի սահմանադրությունը՝ այլ պետություններ առանց կառավարության համաձայնության այցելելով:
«Ես ոչ մի տեղ չեմ գնում, հրաժարական չեմ տալիս։ Մնալու եմ այնտեղ, որտեղ ամբողջ կյանքիս ընթացքում եմ եղել, և ինչի համար եկել եմ Ֆրանսիայից, մնացել այստեղ ու պայքարում եմ մեր երկրի եվրոպական ապագայի ու ժողովրդավարության համար»,- ասել է Զուրաբիշվիլին իր հեռուստաուղերձում։
Խոսելով Սահմանադրական դատարանի որոշման մասին՝ նա հայտարարել է, որ վրդովված է և կարծում է, որ դատավորները պետք է ամաչեն նման վճիռ կայացնելու համար։
Վրաստանի ղեկավարի խոսքով՝ ինքը նախատեսում է մասնակցել խորհրդարանի նիստին, որին քվեարկելու են իմփիչմենթի հարցով։
Հիշեցնենք, որ Վրաստանի Սահմանադրական դատարանը վճռել է, որ նախագահ Սալոմե Զուրաբիշվիլին խախտել է երկրի Սահմանադրությունը։ Խորհրդարանի պատգամավորների՝ նախագահի իմփիչմենթի վերաբերյալ սահմանադրական հայցը պաշտպանել է Սահմանադրական դատարանի վեց անդամ, երեքը դեմէ հանդես եկել։ Այժմ խորհրդարանը երկու շաբաթվա ընթացքում պետք է քննարկի և քվեարկի նախագահին իմփիչմենթի միջոցով պաշտոնանկ անելու հարցով։