Եվրահանձնաժողովը (ԵՀ) նոր վիզային ռազմավարության շրջանակներում նախատեսում է քննարկել ավելի քան հինգ տարի ժամկետով բազմակի վիզաների տրամադրման հնարավորությունը: Այդ մասին հայտնում է Politico եվրոպական պարբերականը։
Թերթի տվյալներով՝ այդ քայլը կխթանի համայնքի տնտեսական աճը և կնվազեցնի հյուպատոսությունների ծանրաբեռնվածությունը։ Տաղանդավոր մասնագետների դիմումները քննարկելու համար ԵՀ-ն նախատեսում է լրացուցիչ ֆինանսավորում հատկացնել և եվրոպական սահմանային ու առափնյա պահպանության գործակալության (Frontex) շրջանակներում ստեղծել վիզային աջակցության բաժին:
Ռազմավարության շրջանակներում ենթադրվում է նաև ստեղծել վիզային սահմանափակող կանոնների նոր կատեգորիա, որը որպես «գործիք» կգործի երրորդ երկրներից դիմորդների դեմ՝ «առանց վիզայի ռեժիմների» նկատմամբ ավելի խիստ վերահսկողության հետ մեկտեղ:
ԵՀ-ն նաև փոփոխություններ կկատարի ԵՄ վիզային օրենսգրքում, որպեսզի այն «ավելի ճկուն և արագ դառնա երրորդ երկրների դեմ պատժամիջոցներ կիրառելու հարցում»:
Ավելի վաղ Euractiv պորտալը հայտնել էր, որ ԵՄ երկրները քննարկում են Frontex-ի գործառույթների փոփոխության, այդ թվում՝ դրա լիազորությունների ընդլայնման հարցը։ Frontex-ի մանդատի վերանայման մասին այս տարի հայտարարել է նաև Եվրահանձնաժողովի նախագահ Ուրսուլա ֆոն դեր Լայենը, հարցը ներառված է ԵՄ-ի 2026 թվականի աշխատանքային ծրագրում։