ՀՀ էկոնոմիկայի նախարար Վահան Քերոբյանը Կառավարության նիստի ընթացքում ներկայացրեց օրենքի նախագիծ, որը վերաբերում է դեղերի արտաքին գովազդին:
Գործող օրենսդրությամբ արգելված է դեղերի արտաքին գովազդը, իսկ գովազդի մյուս տեսակները թույլատրվում են:
«Նման կարգավորման տրամաբանությունն ու հիմնավորումը շատ թույլ է` հաշվի առնելով այն հանգամանքը, որ արտաքին գովազդը, որպես տեղեկատվության ներկայացման հարթակ, շատ ավելի նեղ շրջանակ է ընդգրկում, քան հեռուստագովազդը: Վերջին ժամանակում մենք արտաքին գովազդի շուկայում իրականացված փոփոխությունների արդյունքում կտրուկ նվազեցրել ենք արտաքին գովազդի ոլորտում աշխատող ընկերությունների հասույթը: Արգելել ենք կազինոնաների և շահումով խաղերի գովազդը, դրա արդյունքում ընկերությունները լուրջ խնդիրներ ունեն: Այս փոփոխությամբ փորձում ենք օգնել ընկերություններին, թույլ տալ, որ մի քիչ ավել գումար աշխատեն»,- ասաց Քերոբյանը:
ՀՀ առողջապահության նախարար Անահիտ Ավանեսյանն ավելացրեց, որ սա վերաբերում է միայն առանց դեղատոմսի դուրս գրվող դեղերին:
«Գովազդի թույլտվության վավերապայմանները բավականին խիստ են: Մենք մեր գործընկերների հետ կաշխատենք՝ պաշտպանելու մեր քաղաքացիներին հավելյալ ինքնաբուժման կամ ոչ պատշաճ բուժման սխեմաներ խրախուսելուց»,- ասաց նա: