Թբիլիսիի կենտրոնում՝ Ռուսթավելի պողոտայում, վերականգնվել է երթևեկությունը։ Ինչպես հայտնել ենք, գիշերն այնտեղ անցկացվել է բողոքի զանգվածային ակցիա՝ մինչև 2028 թ․ ավարտը ԵՄ-ին անդամակցության շուրջ բանակցությունները սառեցնելու մասին կառավարության որոշման դեմ։
Ռուսթավելիի պողոտայում տեղակայված խորհրդարանի շենքում անվտանգության կարմիր ռեժիմ է հայտարարվել։
Ընդդիմադիր առաջնորդները կոչ են անում կառավարության որոշմանը դեմ քաղաքացիներին կրկին հավաքվել խորհրդարանի շենքի մոտ այսօր երեկոյան։
Վրաստանի ՆԳՆ հատուկ նշանակության ուժերի աշխատակիցները երեկոյան Ռուսթավելի պողոտան ազատել են` ցուցարարներին դուրս բերելով այնտեղից։ Ոստիկանությունն արցունքաբեր գազ է կիրառել, կան ձերբակալվածներ։