Հայաստանում ԵՄ առաքելությունից, բացի արտաքին քաղաքական իրավիճակի ապակայունացումից և տարածաշրջանի աշխարհաքաղաքական մրցակցության այլ ասպարեզի վերածումից, այլ բան պետք չէ սպասել։
Այս մասին հերթական ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով հարցին, թե ռուսական կողմը Փարիզին ծանուցե՞լ է, որ եվրոպացի դիտորդներին կասկածում է լրտեսության համար։
Ինչպես նշել է Զախարովան, ՌԴ ԱԳՆ-ն Ֆրանսիային չի տեղեկացրել լրտեսության կասկածների մասին։ Նրա խոսքով՝ Մոսկվան հրապարակավ և բացահայտ խոսել է Հայաստանում ԵՄ առաքելության նկատմամբ իր բացասական վերաբերմունքի մասին։
«Մենք բազմիցս մեկնաբանել ենք Հայաստանի տարածքում ԵՄ-ի այս կիսառազմական ներկայության մասին, ապացույցներ փնտրելու կարիք չկա. դրանք ակնհայտ են: Այս առաքելությունն ավելի ու ավելի ակնհայտ է դառնում, երբ նրանք սկսեցին միանալ դրան ԵՄ անդամ չհանդիսացող ՆԱՏՕ-ի երկրներին»,- ասել է ռուս դիվանագետը:
Նա նշել է, որ տարածաշրջանն արդեն անկայուն է, սակայն հնարավորություն կա կայունացնելու իրավիճակը, կարգավորելու երկարաժամկետ ճգնաժամը, որպեսզի բացվեն մարդկանց միջև մարդասիրական հաղորդակցության և տնտեսական զարգացման բոլոր հնարավորությունները։
ՌԴ ԱԳՆ ներկայացուցիչը վստահ է, որ Հարավային Կովկասում բոլոր հարցերը պետք է և կարող են լուծվել տարածաշրջանային երկրների հավաքական ջանքերի հիման վրա՝ բացառապես իրենց շահերից ելնելով և առանց արտաքին միջամտության։
Հիշեցնենք, որ ԵՄ երկարաժամկետ առաքելությունը Հայաստանում է գտնվում 2023 թվականի փետրվարի 20-ից՝ 2 տարի ժամկետով և ի սկզբանե բաղկացած էր 100 հոգուց։
2023 թվականի դեկտեմբերին ԵՄ-ն հայտարարեց առաքելության ընդլայնման մասին՝ մինչև 209 մարդ (նախկին 138-ի փոխարեն): Հայաստանի կառավարությունը վերջին հանդիպումներից մեկում հաստատել է ԵՄ դիտորդների կարգավիճակը՝ այն գործնականում հավասարեցնելով դիվանագիտական կարգավիճակին։