ԱՄՆ նախագահ Ջո Բայդենը «Երկրի վիճակին» նվիրված ելույթը սկսել է՝ ասելով, որ ժողովրդավարությունն ԱՄՆ-ում և նրա սահմաններից դուրս հարվածի տակ է: Քննադատելով Կոնգրեսին՝ Ուկրաինային պաշտպանության համար միջոցներ տրամադրելու անգործության համար՝ Բայդենը հայտարարել է, որ Ռուսաստանի նախագահ Վլադիմիր Պուտինը կանգ չի առնի, եթե հաղթի Ուկրաինայում։
Նախագահը նաև սուր քննադատության է ենթարկել նախկին նախագահ Դոնալդ Թրամփի վերջին ելույթը, որտեղ նա Պուտինին խնդրել է ներխուժել ՆԱՏՕ-ի դաշնակից երկրներ՝ ասելով, որ նման պահվածքը «վրդովեցնող, վտանգավոր և անընդունելի է»: Բայդենը նաև շնորհավորել է Ֆինլանդիային և Շվեդիային՝ ՆԱՏՕ-ին անդամակցելու կապակցությամբ՝ ասելով, որ ՆԱՏՕ-ն «ուժեղ է, քան երբևէ»։ Նա Կոնգրեսին կոչ է արել դիմադրել Պուտինին՝ հայտարարելով՝ «պատմությունը հետևում է մեզ»։
ԱՄն նախագահը ելույթի ժամանակ հրամայել է ամերիկացի զինվորականներին հենակետ հիմնել Գազայի հատվածում, որպեսզի ավելի շատ մարդասիրական օգնություն հասնի անկլավ: Նա ասել է, որ Իսրայելը «հիմնարար պատասխանատվություն» է կրում անմեղ խաղաղ բնակիչներին պաշտպանելու համար՝ հավելելով, որ 2023 թվականի հոկտեմբերին Իսրայել-Համաս պատերազմի սկսվելուց ի վեր ավելի քան 30000 մարդ է զոհվել։ Բայդենը նշել է, որ այդ ծրագրի շրջանակում ամերիկյան զորքեր չեն ուղարկվի Գազա։ Նախագահը նաև վերահաստատել է իր հանձնառությունն Իսրայելի և Պաղեստինի միջև հակամարտության լուծմանը՝ երկու պետության սկզբունքով:
Սպիտակ տան ղեկավարը հայտարարել է նաև, որ Վաշինգտոնը Չինաստանի հետ հակամարտություն չի փնտրում և պատրաստ է հաղթել Չինաստանի հետ մրցակցությունը 21-րդ դարում։ «Մենք ցանկանում ենք մրցակցել Չինաստանի հետ, ոչ թե հակամարտել», – ասել է նա՝ Կոնգրեսում ամենամյա ելույթի ժամանակ: «Մենք լավագույն դիրքում ենք 21-րդ դարում մրցակցության մեջ հաղթելու Չինաստանին կամ ցանկացած այլ երկրի»,- շեշտել է ԱՄՆ նախագահը։