Արևելյան Երուսաղեմի Ալ-Աքսա մզկիթի մոտ ուրբաթ առավոտյան վերսկսվել են բախումները պաղեստինցիների և իսրայելական ուժերի միջև։ Ավելի քան 40 մարդ է վիրավորվել։ Տուժածների կեսը հոսպիտալացվել է, նրանց կյանքին վտանգ չի սպառնում՝ գրում է Euronews-ը։
Իսրայելի ոստիկանության տվյալներով՝ պաղեստինցիներն օգտագործել են պայթուցիկներ և քարեր են նետել իրավապահների ուղղությամբ։ Վերջիններն էլ կիրառել են արցունքաբեր գազ և ռետինե փամփուշտներ։
Վերջին երկու շաբաթվա ընթացքում հարյուրավոր մարդիկ են տուժել այս վայրերում անկարգությունների և փոխհրաձգությունների հետևանքով։
Միաժամանակ, մի քանի օր առաջ 250 000 մուսուլման Տաճարի լեռան վրա մասնակցել է իսլամում հարգված «Ալ-Կադրի գիշերների» առիթով աղոթքին: