Այսօր՝ հունիսի 23-ին, արտակարգ դեպք է տեղի ունեցել Շիրակի մարզում։ Ժամը 11:55-ի սահմաններում ՀՀ Ներքին գործերի նախարարության Փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Գյումրի քաղաքի Մովսես Խորենացի փողոցում գործող ավտոտեխսպասարկման կետում քաղաքացին արգելափակվել է ավտոմեքենայի և պատի արանքում։
Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են Գյումրու թիվ 48/1 հրշեջ-փրկարարկան ջոկատից 1 մարտական հաշվարկ։Ժամանել են նաև ՀՀ ՆԳՆ Ոստիկանության Շիրակի մարզի գումարտակի պարեկները:Դեպքի վայր է ժամանել ոստիկանության Շիրակի մարզային վարչության պետ Արթուր Բդոյանը։
Պարզվել է, որ ավտոմեքենան մասամբ անջատվել է ֆիքսված ամրաններից, որի արդյունքում էլ աշխատակիցը արգելափակվել է ավտոմեքենայի և պատի միջնամասում։
Օպերատիվորեն ժամանած Գյումրու բժշկական կենտրոնի շտապօգնության բժիշկները տեղում առաջին բուժօգնություն են ցուցաբերել վիրավորին, ապա պարեկները, փրկարարներն ու քաղաքացիները հատուկ տեխնիկայի կիրառմամբ արգելափակումից դուրս են բերել քաղաքացուն և պատգարակով մոտեցրել շտապօգնության ավտոմեքենային։
Վիրավորը տեղափոխվել է Գյումրու բժշկական կենտրոն։
Դեպքի փաստով ոստիկանության տարածքային բաժնում փաստաթղթեր են ձևակերպվում։