ԱԺ առողջապահության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստի ընթացքում ՀՀ առողջապահության նախարար Անահիտ Ավանեսյանին հարց ուղղեցին ջրծաղիկի տարածվածության և կանխարգելման հնարավորությունների մասին:
«2020 թվականին ունեինք բոլոր ինֆեկցիոն հիվանդությունների, այդ թվում նաև՝ ջրծաղիկի կտրուկ նվազում: Հիմա մենք վերադառնում ենք նախաքովիդյան համաճարակային իրավիճակին, որը գտնվում է մեր երկրի համար սեզոնային ակտիվության շրջանակներում»,- ասաց Ավանեսյանը:
Կանխարգելելու համար աշխարհում արվում են պատվաստումներ, բայց, նախարարի խոսքով, ջրծաղիկի դեմ պատվաստումը ներառված չէ ազգային ծրագրում:
«Մինչև քովիդը հաշվարկներ իրականացրել էինք, որ առաջնային՝ զինակոչիկների և երեխաների համար ստեղծվեր այդ հնարավորությունը: Մենք պետք է վերադառնանք այդ ծրագրին և ջրծաղիկի դեմ պատվաստանյութն ընդգրկենք ազգային ծրագրով ձեռք բերվող պատվաստանյութերի մեջ»,- ասաց Ավանեսյանը: