Լեռնային Ղարաբաղից Հայաստան տեղափոխված շուրջ 100 խնամքի կարիք ունեցող միայնակ տարեցներ տեղավորվել են համապատասխան խնամքի կենտրոններ։
Այս մասին Կառավարության «Հումանիտար կենտրոնի» ճեպազրույցի ժամանակ տեղեկացրեց Աշխատանքի և սոցիալական հարցերի նախարար Նարեկ Մկրտչյանը։
Նրա ներկայացմամբ՝ Ժամը 14:00-ի դրությամբ արցախցիներից ավելի քան 15,300 կարիք է արձանագրվել։
Մկրտչյանի խոսքով՝ իրենց ուշադրության կենտրոնում են նաև խոցելի խմբերը։ Նա հավելեց, որ Վայոց ձորի, Սյունիքի մարզերում ԼՂ մեր հայրենակիցների առաջնային կարիքների գնահատմանը զուգահեռ ջանքերն առավել կենտրոնացվել են խոցելի խմբերին ծառայություններ տրամադրելուն:
«Վերջին մեկ- երկու օրվա ընթացքում մեր ջանքերը գործադրել ենք առավել խոցերի խմբերին ծառայություններ տրամադրելու․ միայնակ տարեցների, հաշմանդամության խնդիրներ ունեցողներին, առանց ծնողական խնամքի մնացած երեխաներին համապատասխան հաստատություններում տեղավորելու ուղղությամբ։
100 տարեց մարդ, այդ թվում՝ հաշմանդամություն ունեցող և 20 ծնողազուրկ երեխա` Լեռնային Ղարաբաղից բռնի տեղահանված, տեղավորվել են Հայաստանի մասնագիտացված հաստատություններում»,- մանրամասնեց նախարարը։