Լոս Անջելեսում մոլեգնող անտառային հրդեհներն ԱՄՆ պատմության մեջ կարող են լինել ամենածավալուն և ռեկորդային վնաս պատճառած բնական աղետը, ասել է Կալիֆոռնիայի նահանգապետ Գևին Նյուսոմը: Այս մասին գրում է Financial Times-ը։
Նա նշել է, որ զոհերի թիվը, ամենայն հավանականությամբ, զգալիորեն կաճի։ Ըստ վերջին տվյալների՝ այն հասել է 24-ի:
Իշխանությունները հրդեհների պատճառած վնասի հստակ գնահատականներ չեն ներկայացրել։ Օդերևութաբանական հաշվետվություններ տրամադրող AccuWeather ընկերության գնահատականներով՝ հրդեհները 135-150 միլիարդ դոլարի տնտեսական վնաս են պատճառել, Կալիֆոռնիայի անտառտնտեսության և հրդեհային պաշտպանության նախարարության տվյալներով՝ հրդեհներից այրվել է առնվազն 16100 հեկտար տարածք, ավերվել է 12300 շինություն:
Հրդեհների մարմանը մասնակցել են հազարավոր հրշեջներ, օգտագործվել են ծանր բեռնատարներ ու ինքնաթիռներ։ Նախօրեին Արտակարգ իրավիճակների կառավարման դաշնային գործակալության ղեկավար Դին Քրիսվելը հավանական է համարել զինվորականների ներգրավումը հրդեհների դեմ պայքարում: Նա զգուշացրել է, որ առաջիկա օրերին սպասվում են ուժեղ քամիներ, որոնք նպաստում են կրակի տարածմանը։