Չինաստանի արտգործնախարարությունը պաշտոնապես հաստատել է, որ ԱՄՆ նախագահ Դոնալդ Թրամփը մայիսի 13-15-ը կայցելի Չինաստան։ 2017 թվականից հետո սա կլինի ԱՄՆ գործող նախագահի առաջին այցն այդ երկիր։
Նախատեսվում է, որ Թրամփը Սի Ծինփինի հետ կքննարկի առևտրային հարցերը և Իրանի հետ հակամարտությունը: Ակնկալվում է, որ նա Պեկինին կոչ կանի օգտագործել իր ազդեցությունը, որպեսզի ստիպի Իրանին գործարքի գնալ Վաշիգնտոնի հետ, հաղորդում է Eurօnews-ը:
Չինաստանը և ԱՄՆ-ն դարձյալ տարաձայնություններ ունեն մի շարք առանցքային հարցերի շուրջ, այդ թվում՝ առևտրային սակագների, նշում են վերլուծաբանները։
Մեկն ամերիկա-իսրայելական հակամարտությունից հետո Թեհրանի հետ ստեղծված իրավիճակն է: Այն կարող է լարվածություն առաջացնել, քանի որ Չինաստանն իրանական նավթի հիմնական գնորդներից մեկն է: Մյուսը Թայվանն է, որը Չինաստանը համարում է իր տարածքի մի մասը։