ԱՄՆ պետքարտուղարի Եվրոպայի և Եվրասիական տարածաշրջանի հարցերով օգնական Ջեյմս Օ’Բրայենը հայտարարել է, որ ԱՄՆ-ն և Հայաստանը ուսումնասիրում են քաղաքացիական միջուկային էներգետիկայի ոլորտում համագործակցության հնարավորությունները։
«Հայաստանը կարևոր երկիր է քաղաքացիական միջուկային էներգետիկայի ոլորտում ԱՄՆ համագործակցության ծրագրերի համար: ԱՄՆ-ը և Հայաստանն ուսումնասիրում են քաղաքացիական ատոմային էներգետիկայի ոլորտում համագործակցության հնարավորությունները։ Այս համագործակցությունը հիմնված է 2022 թվականի քաղաքացիական միջուկային համագործակցության համաձայնագրի վրա և կսահմանի որոշ կոնկրետ նախագծեր, որոնց առաջխաղացման ուղղությամբ էլ մենք կաշխատենք։ Ուստի սկզբում, քանի դեռ Հայաստանը կշռադատում է փոխարինման տարբերակները, մենք կֆինանսավորենք տեխնիկատնտեսական հատվածը, կիրականացնենք գիտական փոխանակումներ նոր հնարավորությունների բացահայտման համար և կսկսենք ուսումնասիրել ֆինանսավորման տարբերակները Հայաստանի տնտեսության դիվերսիֆիկացման համար»,- նշել է Օ’Բրայենը։
Նրա խոսքով՝ ԱՄՆ ջանքերն ուղղված են Հայաստանի տնտեսության դիվերսիֆիկացմանը, քաղաքական բարեփոխումներին և տարածաշրջանում կայունության ու խաղաղության ապահովմանը։