47 տարի տևած ահաբեկչության սպառնալիքը ավարտման փուլում է՝ Քրդստանի աշխատավորական կուսակցության կողմից զենքը վայր դնելու վերաբերյալ իր ուղերձում հայտարարել է Թուրքիայի նախագահ Ռեջեփ Էրդողանը՝ ելույթ ունենալով Անկարայում:
«Ահաբեկչական կազմակերպության կողմից զենքը վայր դնելուց հետո Թուրքիան հաղթեց, հաղթեց թուրք ժողովուրդը։ Հաղթել են թուրքերը, քրդերը, արաբները՝ մեր 86 միլիոն քաղաքացիներից յուրաքանչյուրը»,- ասել է Էրդողանը:
Նա նշել է, որ նախկինում ահաբեկչության դեմ պայքարին ուղղված ռեսուրսները այսուհետ կուղղվեն Թուրքիայի զարգացմանն ու բարգավաճմանը:
Թուրքիայի ղեկավարի խոսքով՝ ահաբեկչության դեմ պայքարը երկրի տնտեսության համար մոտ 2 տրիլիոն դոլար է արժեցել:
Ավելի վաղ նշվել է, որ ՔԱԿ-ի 30 անդամից բաղկացած առաջին խումբը զենքը հանձնել է Իրաքի Սուլեյմանիա քաղաքին պատկանող Սուրդաշ շրջանում: