ՀՀ կառավարության որոշման նախագծով առաջարկվում է ուժը կորցրած ճանաչել 2024 թվականի օգոստոսի 22-ի՝ «Ակադեմիական քաղաքի» ծրագրի իրականացման նպատակով որոշ տարածքների նկատմամբ հանրության գերակա շահ ճանաչելու մասին որոշումը և նույն տարածքների նկատմամբ կրկին ճանաչել հանրության գերակա շահ։
Ինչպես տեղեկացնում է Iravaban.net–ը, նախագծի հիմնավորման համաձայն՝ դրա անհրաժեշտությունը պայմանավորված է «Ակադեմիական քաղաք» ծրագրի իրավական հիմքերի հստակեցմամբ և սեփականության օտարման կարգավորումների փոփոխությամբ։
Ինչո՞ւ է անհրաժեշտ նոր որոշում ընդունել
2024 թվականին կառավարությունն արդեն հանրության գերակա շահ էր ճանաչել Երևանի և Արագածոտնի մարզի Աշտարակ համայնքի Սասունիկ բնակավայրի վարչական սահմաններում գտնվող որոշ տարածքների նկատմամբ՝ «Ակադեմիական քաղաք» ծրագիրն իրականացնելու նպատակով։
Սակայն դրանից հետո փոխվել են ինչպես ծրագրի իրավական հիմքերը, այնպես էլ հանրության գերակա շահերի ապահովման նպատակով սեփականության օտարման կարգավորումները։
Մասնավորապես՝ 2026 թվականի փետրվարի 11-ին ընդունված ՀՕ-28-Ն օրենքով փոփոխություններ են կատարվել օտարվող սեփականության նույնականացման, գույքի նկարագրության, ծանուցումների, գնահատման և փոխհատուցման ընթացակարգերում։
Նախագծի հիմնավորման համաձայն՝ նախկին որոշմամբ նախատեսված գույքերի նկատմամբ ձեռքբերողի սեփականության իրավունքը չի գրանցվել օրենքով նախատեսված ժամկետներում։ Հետևաբար՝ առկա են նախկին որոշումն ուժը կորցրած ճանաչելու և նույն գույքերի նկատմամբ հանրության գերակա շահը նոր որոշմամբ կրկին ճանաչելու իրավական հիմքերը։
Ո՞ր տարածքների նկատմամբ է ճանաչվելու հանրության գերակա շահը
Նախագծով առաջարկվում է հանրության գերակա շահ ճանաչել Երևանի և Արագածոտնի մարզի Աշտարակ համայնքի Սասունիկ բնակավայրի վարչական սահմաններում գտնվող՝ նախագծի երեք հավելվածներում նկարագրված տարածքների նկատմամբ։
Նշված տարածքներն անհրաժեշտ են «Ակադեմիական քաղաք» ծրագրի իրականացման, կրթական և գիտահետազոտական գործունեության, ինչպես նաև համապատասխան ենթակառուցվածքների ստեղծման համար։
Նախագծի հիմնավորման համաձայն՝ առանց այդ գույքերի օտարման հնարավոր չի լինի ապահովել ծրագրով նախատեսված միջոցառումների և անհրաժեշտ ենթակառուցվածքների կառուցման իրականացումը։
Ո՞վ է կազմակերպելու սեփականության օտարումը
Նախկին որոշմամբ Երևանի տարածքում օտարման գործընթացի իրականացումը վերապահված էր Երևանի քաղաքապետին։ Քաղաքապետարանի կողմից որոշ աշխատանքներ արդեն կատարվել էին, այդ թվում՝ կազմվել էին որոշ գույքերի նկարագրության արձանագրություններ։ Սակայն հետագա աշխատանքների համար պահանջվող ֆինանսավորումը չէր հաստատվել, ինչի հետևանքով գործընթացը չէր շարունակվել։
Նոր նախագծով առաջարկվում է փոխել գործընթացի կազմակերպման մոտեցումը։ Որպես պատասխանատու և գործընթացը համակարգող պետական լիազոր մարմին նախատեսվում է սահմանել ՀՀ կրթության, գիտության, մշակույթի և սպորտի նախարարության Բարձրագույն կրթության և գիտության կոմիտեն։
Գույքերի օտարման հետ կապված աշխատանքները նախատեսվում է իրականացնել մրցութային կարգով ներգրավվող խորհրդատուի միջոցով։
Ի՞նչ ժամկետներ են նախատեսվում
Նախագծով սահմանվում են սեփականության օտարման և ծրագրի իրականացման հետևյալ ժամկետները՝
2027 թվականի դեկտեմբերի 15-ը՝ սեփականության օտարման գործընթացն սկսելու վերջնական ժամկետը։
2028 թվականի հունվարի 31-ը՝ սեփականատերերին և գույքային իրավունքներ ունեցող անձանց օտարման պայմանագրերի նախագծերն ուղարկելու վերջնական ժամկետը։
2031 թվականի օգոստոսի 31-ը՝ օտարված գույքի օգտագործմամբ հանրության գերակա շահ ճանաչված նպատակի իրագործումն սկսելու վերջնաժամկետը։
2035 թվականի դեկտեմբերի 31-ը՝ այդ նպատակի իրագործումն ավարտելու վերջնաժամկետը։
Նշված ժամկետները պայմանավորված են ծրագրի բազմամյա և փուլային բնույթով, ինչպես նաև տարածքների նախապատրաստման, գույքերի գնահատման և ենթակառուցվածքների ստեղծման համար անհրաժեշտ աշխատանքներով։
Ինչպե՞ս են փոխհատուցվելու սեփականատերերը
Նախագծի հիմնավորման համաձայն՝ սեփականության օտարումն իրականացվելու է օրենքով սահմանված կարգով՝ արդարացի և համարժեք փոխհատուցման երաշխիքների պահպանմամբ։
Միաժամանակ նշվում է, որ փոխհատուցման և օտարման գործընթացի այլ ծախսերի ֆինանսավորման սխեման դեռ քննարկվում է։
Ֆինանսավորման մի մասը նախատեսվում է ապահովել պետական բյուջեի միջոցներից՝ «Ակադեմիական քաղաք» ծրագրի գծով կատարված հատկացումների շրջանակում՝ գույքերի գնահատման արդյունքների հիման վրա։ Երևանի վարչական սահմաններում գտնվող գույքերի մասով հաշվի կառնվեն նաև կառավարության կողմից Երևանում կատարվող ներդրումները։
Բացի այդ, մշակվում են մասնավոր ֆինանսավորման ներգրավման ներդրումային սխեմաներ։
Ի՞նչ է փոխվելու սեփականատերերի համար
Նախագծի ընդունման դեպքում նախկին որոշումը կճանաչվի ուժը կորցրած, իսկ նույն տարածքների նկատմամբ հանրության գերակա շահը կրկին կճանաչվի նոր որոշմամբ։
Սեփականության օտարման գործընթացը նախատեսվում է իրականացնել գործող օրենսդրությամբ սահմանված ընթացակարգերով։ Սա չի նշանակում, որ գույքերն արդեն օտարվել են կամ փոխհատուցման չափերն արդեն որոշված են․ այդ հարցերը պետք է կարգավորվեն օտարման գործընթացի համապատասխան փուլերում։
Նախագիծը մշակվել է ՀՀ կրթության, գիտության, մշակույթի և սպորտի նախարարության կողմից։
Նախագծի ընդունման արդյունքում ակնկալվում է ապահովել «Ակադեմիական քաղաք» ծրագրի համար անհրաժեշտ տարածքների նկատմամբ հանրության գերակա շահի ճանաչումը գործող իրավական կարգավորումների շրջանակում և ստեղծել ծրագրի իրականացման համար անհրաժեշտ գույքային ու իրավական նախադրյալներ։