Հուլիսի 1-ին գումարված Ազգային ժողովի արտահերթ նիստը խորհրդարանի խոսնակ Ալեն Սիմոնյանը մեկնարկեց շնորհավորանքներով:
«Այսօր Դատախազության աշխատողի օրն է, և առաջարկում եմ շնորհավորել Դատախազության աշխատակիցներին, ինչպես նաև Պետական պահպանության ծառայության աշխատակիցների տոնն է. Պետական պահպանության բոլոր տղաներին շնորհակալություն ենք հայտնում և շնորհավորում ենք»,- ասաց նա:
Ալեն Սիմոնյանը տեղեկացրեց, որ այսօր նաև «Հայաստան» խմբակցության ղեկավար Սեյրան Օհանյանի ծննդյան օրն է, նրան ևս շնորհավորեց, ապա նկատեց, որ Օհանյանը դահլիճում չէ:
«Արդեն որերորդ անգամ է՝ ինձ տեղեկություններ են տրամադրվում, որ առողջական խնդրի պատճառով է [բացակայում]: Առիթն օգտագործելով՝ ուզում եմ տեղեկացնել, որ անընդհատ բժշկի թուղթ բերելով՝ չեմ կարող [բացակայությունը] անընդհատ հարգելի համարել, և խնդրում եմ նման աշխատելաոճից հնարավորինս զերծ մնալ:
Առողջություն ենք ցանկանում պարոն Օհանյանին»,- ասաց նա: