ՀՀ ԱԺ նախագահ Ալեն Սիմոնյանը Լոնդոնում հանդիպել է Լորդերի պալատի խոսնակ Լորդ Մըքֆոլլի հետ: Այս մասին հայտնել է ՀՀ Ազգային ժողովը։
«Հանդիպմանը մասնակցել է նաևՀՀ ԱԺ նախագահի տեղակալ Ռուբեն Ռուբինյանը:
Անդրադարձ է եղել դիվանագիտական հարաբերությունների հաստատման 30-ամյա ձեռքբերումներին, երկկողմ կապերի խթանմանն ուղղված հետագա անելիքներին: Զրուցակիցները քննարկել են ոլորտային փոխգործակցության խորացման և ընդլայնման հնարավորություններն ու առաջիկա ծրագրերը:
Առանցքային են համարվել համատեղ օրակարգի առաջմղմանն ուղղված քայլերը:
Կողմերը կարևորել են երկկողմ համագործակցության զարգացումն ու ընդլայնումը, մտքեր փոխանակել հայ-բրիտանական միջխորհրդարանական կապերի վերաբերյալ: Այս համատեքստում ընդգծվել է բարեկամական խմբերի համագործակցված աշխատանքի ակտիվացումը»,- ասված է հաղորդագրության մեջ: