ԱՄՆ պետքարտուղարությունն Ադրբեջանին կոչ է արել հարգել մարդու իրավունքներն ուր բոլորի հիմնարար ազատությունները. այս մասին ասել է գերատեսչության խոսնակ Մեթյու Միլլերը՝ անդրադառնալով Ադրբեջանում ընդդիմադիր քաղաքական գործչի՝ Թոֆիք Յագուբլուի ձերբակալմանը:
«Ադրբեջանում լրագրողների, քաղաքացիական հասարակության ակտիվիստների և ընդդիմադիր գործիչների կալանավորման վերջին միտումը խորապես մտահոգիչ է: Ընդամենը վերջին մեկ ամսվա ընթացքում մեկ տասնյակից ավելի նման գործիչներ են բերման ենթարկվել: Դա անընդունելի է, և մենք կշարունակենք Ադրբեջանի կառավարությանը կոչ անել հարգել բոլորի մարդու իրավունքները և հիմնարար ազատությունները, ներառյալ խոսքի ազատությունը կիրառողների, ինչպես նաև կոչ անել արագ ազատ արձակել բոլոր նրանց, ովքերանարդարացիորեն կալանավորվել են», – ասել է Միլլերը: