Ուզում եմ իմ գնահատանքի խոսքերն ասել բոլորիդ աշխատանքի առիթով, և ուզում եմ ընդգծել, որ, իսկապես, ԱԱԾ-ն այլ ծառայությունների հետ համատեղ մեր պետության ողնաշարն է, մեր պետության լինելության և անվտանգության կարևոր ինստիտուտներից մեկն է: Այդ մասին ԱԱԾ աշխատակազմին ծառայության նոր տնօրենին ներկայացնելիս ասաց վարչապետ Նիկոլ Փաշինյանը:
«Այն բոլոր մարտահրավերները, որոնք կարող էին ապակայունացնել ՀՀ-ն և անվտանգային մարտահրավերներ ստեղծել, այդ բոլոր մարտահրավերները մինչև այս պահը հաջողությամբ չեզոքացված են:
Իհարկե, որևէ կերպ չեմ ուզում նսեմացնել ԱԱԾ ղեկավարության, տնօրենի, տնօրենի տեղակալների դերը, բայց նաև ուզում եմ ընդգծել, որ ԱԱԾ բոլոր աշխատողների և բոլոր ներկաների առանձնահատուկ դերակատարումն այդ ամենում անհրաժեշտ է ընդգծել»,- ասաց նա:
Փաշինյանը նաև ընդգծեց, որ ԱԱԾ-ն պետք է կենտրոնանա երեք հիմնական գործառույթների վրա՝ հակահետախուզություն, ահաբեկչության դեմ պայքար, սահմանադրական կարգի պահպանություն: