Տնտեսական համագործակցության կազմակերպության 17-րդ գագաթնաժողովի շրջանակում հանդիպել են Իրանի և Ադրբեջանի նախագահները:
Մասուդ Փեզեշքիանը և Իլհամ Ալիևն ընդգծել են երկու հարևան երկրների հարաբերությունների բարեկամական և եղբայրական բնույթը: Ալիևը նշել է, որ Իսրայելի և Իրանի միջև հակամարտության սկսվելուց անմիջապես հետո Բաքուն դատապարտել է Իրանի դեմ գործողությունները։ Նա ցավակցություն է հայտնել իրանցի պաշտոնյաների և քաղաքացիական անձանց մահվան կապակցությամբ, աջակցություն հայտնել Իսլամական Հանրապետությանը և ժողովրդին։
«Իլհամ Ալիևը նշել է, որ մուսուլմանական երկրների, այդ թվում՝ հարևան պետությունների հետ հարաբերությունների զարգացումն Ադրբեջանի արտաքին քաղաքականության առաջնահերթություններից է»,- ասված է ադրբեջանական կողմի հաղորդագրության մեջ։
Իրանի նախագահն էլ հայտարարել է, որ վերջին շրջանում Իրան-Ադրբեջան հարաբերություններում նոր էջ է բացվել, Բաքու-Թեհրան, Բաքու-Թավրիզ չվերթներն ավելացել են։ Փեզեշքիանը նաև երախտագիտություն է հայտնել Իսրայելի հետ հակամարտության ընթացքում Բաքվի աջակցության և համերաշխության համար։