Պարզել եմ հետևյալը՝ քաղաքացին երկու օր առաջ «Զվարթնոց» օդանավակայանում փորձել է մեկնել Հայաստանից, ու քանի որ հետախուզում է հայտարարված եղել, նրան թույլ չի տրվել, և նա հանձնվել է ոստիկանությանը: Այդ մասին Ազգային ժողով-Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ անդրադառնալով այն տեղեկությանը, որ Գյումրի քաղաքում ՌԴ ռազմական ոստիկանության աշխատակիցների կողմից առևանգվել է ՌԴ քաղաքացի Անատոլի Նիկոլաևիչ Շչետինը և 102-րդ ռազմաբազայի տարածքում պահվում է ապօրինի անազատության մեջ:
«Քանի որ հետախուզումը կալանքով չի եղել, ինչ-որ պրոցեդուրայից հետո մարդուն ազատ են արձակել, որից հետո հիմա մենք փորձում ենք պարզել նրա գտնվելու վայրը»,- ասաց նա և հավելեց, որ սա, այնուամենայնիվ, նախնական տեղեկություն է:
Հիշեցնենք, որ երեկ ՀՔԱ Վանաձորի գրասենյակը ահազանգ էր ստացել ՀՀ Գյումրի քաղաքում ՌԴ ռազմական ոստիկանության աշխատակիցների կողմից՝ ՌԴ քաղաքացի Անատոլի Նիկոլաևիչ Շչետինին առևանգելու և 102-րդ ռազմաբազայի տարածքում ապօրինի անազատության մեջ պահելու մասին։ Ըստ տեղեկության՝ ՌԴ քաղաքացին հետախուզման մեջ էր և ապաստանել էր Հայաստանում զինվորական ծառայությունից հրաժարվելու հիմքով։