Գյումրու զարկերակը մշտապես բաբախել է արվեստով։ Այստեղ, որտեղ ցավն ու վիշտը երկար են բնակվել, արմատավորվել են նաև լույսն ու վերածնունդը։ Եվ այդ լույսերից մեկն է «Վարդուհի» արվեստի դպրոցը, որը նշեց հիմնադրման տասնամյակը: Գյումրու աճեմյանական մեծ բեմին այս անգամ «Վարդուհի» արվեստի դպրոցի սաներն են: Դպրոցը կառուցվեց ու սկսեց շահագործվել 10 տարի առաջ ամերիկաբնակ, պոլսահայ մեծանուն բժիշկ Հովհաննես Օյունջյանի շնորհիվ, անձնական միջոցներով հիմք դրեց մի հաստատության, որը պիտի փոխեր հարյուրավոր գյումրեցի երեխաների ճակատագրերը։