Մոսկվան երկխոսության մեջ է տարածաշրջանային բոլոր խաղացողների հետ: Այդ մասին ամենշաբաթյա ճեպազրույցի ընթացքում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով Հարավային Կովկասում աշխարհաքաղաքական իրավիճակի ու սահմանների փոփոխության միտումների վերաբերյալ Իրանի ԱԳ նախարարի հայտարարության հետ կապված հարցին:
«Մեր սկզբունքային դիրքորոշումը հետևյալն է. մեզ համար Հարավային Կովկասում աշխարհաքաղաքական կայունության և անվտանգության ապահովման խնդիրը գերակա է: Մեր երկիրը վարում է համապատասխան համալիր քաղաքականություն, այդ թվում՝ երկխոսության մեջ լինելով տարածաշրջանային բոլոր խաղացողների հետ»,- նշել է Զախարովան:
Նա հավելել է, որ Մոսկվայում հոկտեմբերի 6-ին կայացած հանդիպման ընթացքում Ռուսաստանի և Իրանի ԱԳ նախարարները քննարկել են Թուրքիայի նախագահ Էրդողանի առաջարկած՝ «3 + 3 հարթակի» (Հայաստան, Վրաստան, Ադրբեջան, Ռուսաստան, Իրան, Թուրքիա) ստեղծման հնարավորությունը:
Զախարովան նշել է, որ այդ հարցում Իրանը դրական է տրամադրված: