Ռուսաստանի նախագահ Վլադիմիր Պուտինը հայտարարել է Ադրբեջանի և Հայաստանի միջև վեճերի կարգավորման գործում ռուսական դիվանագիտության դերի աճի մասին։
«Անկասկած, ռուսական դիվանագիտության դերը մեծանում է Ադրբեջանի և Հայաստանի միջև վեճերը լուծելու, Անդրկովկասում տնտեսական կապերը վերականգնելու և տրանսպորտային միջանցքների ապաշրջափակմանն ուղղված ջանքերի շարունակման գործում։ Փոխվարչապետների մակարդակով ստեղծել ենք համապատասխան միջպետական հանձնաժողով, այն աշխատում է, և իմ կարծիքով՝ այնտեղ վատ հեռանկարներ չեն։ Իրականում, տարածաշրջանի բոլոր երկրները, այդ թվում՝ Ռուսաստանը, շահագրգռված են խնդրի երկարաժամկետ կարգավորմամբ», – ասաց նա՝ ելույթ ունենալով ՌԴ ԱԳՆ կոլեգիայի ընդլայնված կազմով նիստում։
«Մեկ տարի առաջ Ռուսաստանի ակտիվ միջնորդական ջանքերի շնորհիվ Լեռնային Ղարաբաղում հակամարտությունը դադարեցվեց, սակայն հայ-ադրբեջանական սահմանին վերջին կրակոցները ցույց տվեցին, որ իրավիճակը այս տարածաշրջանում դեռ ամբողջությամբ չի հանդարտվել», – նշեց նա։
«Կայունություն ապահովելու համար կարևոր են ռուսական խաղաղապահ կոնտինգենտի ջանքերը՝ որպես հրադադարի և խաղաղ բնակիչների անվտանգության երաշխավոր»,- հավելել է Պուտինը։