«Ռուսաստանն իր պատմության մեջ առաջին անգամ միայնակ է կռվում ամբողջ Արևմուտքի դեմ։ Առաջին և Երկրորդ համաշխարհային պատերազմներում մենք դաշնակիցներ ունեինք։ Հիմա դաշնակիցներ չունենք մարտադաշտում։ Հետևաբար, պետք է հույսը դնեք ինքներս ձեզ վրա, չենք կարող թույլ տալ որևէ թուլություն կամ անգործություն»,- ասել է ՌԴ ԱԳ նախարար Սերգեյ Լավրովը՝ ելույթ ունենալով «Մտքերի տարածք» երիտասարդական ֆորումում:
Նա նշել է, որ գալիք տասնամյակը դժվար է լինելու բազմաթիվ մարտահրավերների պատճառով, այդ թվում՝ ՆԱՏՕ-ի գործողությունների, հետևաբար շատ աշխատանք ունեն անելու, իսկ ամենակարևորը հաղթանակն է։ Լավրովի խոսքով՝ Ռուսաստանի դիրքորոշումը մնում է անփոփոխ. Մոսկվան պահանջում է հրաժարվել ՆԱՏՕ-ին Ուկրաինայի անդամակցությունից, դադարեցնել դաշինքի ընդլայնումը և ճանաչել «գետնի վրա իրողությունները»:
Նա հավելել է, որ Ռուսաստանը միշտ կողմ է եղել երկխոսությանը, նույնիսկ ամենալարված ժամանակահատվածներում, այդ թվում՝ սառը պատերազմի ժամանակ։ Սակայն, նրա խոսքով, ի տարբերություն այդ դարաշրջանի, այսօր բացակայում է փոխադարձ հարգանքը:
«Եվրոպական երկրները հարյուր միլիարդավոր եվրոներ են ներդրել Ուկրաինային աջակցելու համար ոչ թե անշահախնդրորեն, այլ Ռուսաստանին թուլացնելու նպատակով»,- ասել է ռուս դիվանագետը։