Ռուսաստանի Վոլգոգրադի մարզում լույս մայիսի 14-ն անօդաչու թռչող սարքի հարվածի հետևանքով վառելիք տեղափոխող բեռնատար գնացքը դուրս է եկել ռելսերից ու բռնկվել։
«Ռուսական երկաթուղիներ»-ի տվյալներով՝ գիշերը «Կոտլուբան» կայարանի մոտ գնացքը ռելսերից դուրս է եկել «կողմնակի միջամտության պատճառով»։ Զոհեր և վիրավորներ չկան: Շտապօգնության ծառայությունները տեղում են։
Ինչպես հաղորդում է Baza թելեգրամյան ալիքը, գնացքի ռելսերից դուրս գալու պատճառը եղել է անօդաչու թռչող սարքի հարձակումը։ Դրա հետևանքով վառելիքով երկու վագոն բռնկվել է, մեկն էլ պայթել է։
Ընդհանուր առմամբ ռելսերից դուրս է եկել գնացքի ինը վագոն։ Տեղում բռնկված հրդեհը տեղայնացվել է, սակայն այն դեռ ամբողջությամբ չի մարվել։