«Ադրբեջանի նախագահ Իլհամ Ալիևի կողմից «Լրատվամիջոցների մասին» նոր օրենքի հաստատումից հետո Ադրբեջանում լրագրող կամ սոցիալական մեդիայի ակտիվիստ լինելն էլ ավելի դժվար կլինի»:
Այդ մասին հայտարարել է Նորվեգիայի Հելսինկյան կոմիտեն։
Նշվել է, որ նոր օրենքը մի շարք սահմանափակումներ կդնի Ադրբեջանում առանց այն էլ խիստ վերահսկվող լրատվամիջոցների վրա:
Կազմակերպությունն ընդգծել է, որ Ադրբեջանում անկախ և քննադատական ԶԼՄ-ները հաճախ ենթարկվում են գրաքննության և փակվում, լրագրողներն ու սոցցանցերի օգտատերերը հետապնդվում և ձերբակալվում են։
Մատնանշվել է, որ նոր օրենքի շատ դրույթներ թույլ կտան իշխանությանը խստորեն սահմանափակել իրադարձությունների լուսաբանումն ու կօգտագործվեն ղեկավարության դեմ քննադատությունները կանխելու համար:
Բացի դրանից՝ իշխանությունն այս կամ այն լրատվամիջոցը փակելու համար դատարանի որոշման կարիք այլևս չի ունենա։
«Ադրբեջանի միջազգային գործընկերները պետք է բարձրաձայնեն, թե որքան կործանարար կլինեն այս նոր սահմանափակումները մի երկրում, որտեղ անձնիշխանությունը կառուցվում է լրատվամիջոցներին և քննադատական ձայները ճնշելու միջոցով»,- ասվում է հայտարարության մեջ։