Մարզերից Երևան եկող ավտոբուսների կայանման վերջնակետ պետք է սահմանվեն ավտոկայարանները, նշված ավտոբուսների մուտքը մայրաքաղաք կսահմանափակվի։
Այս մասին Iravaban.net-ի հարցմանն ի պատասխան հայտնեցին Երևանի քաղաքապետարանից։
Մեզ հայտնեցին, որ Կառավարության որոշմամբ՝ ավտոբուսային կանոնավոր փոխադրումներն իրականացվում են ավտոկայարաններից, և երթակարգավարական կետերից, ինչը ենթադրում է, որ մարզերից դեպի Երևան շահագործվող միջմարզային երթուղիների աշխատանքը պետք է ավարտվի ավտոկայաններում` չմտնելով Երևանի վարչական տարածք և չծանրաբեռնելով մայրաքաղաքի երթևեկությունը:
«Հարկ է նշել, որ Երևան քաղաքի հանրային տրանսպորտի նոր երթուղային ցանցը մշակած բրիտանական WYG խորհրդատվական ընկերության կողմից 2019թ. ներկայացված հաշվետվությամբ նախատեսվել են Երևանի ներհամայնքային երթուղիներ, որոնք հասնելու են ավտոկայարաններ և սպասարկելու են մարզերից մայրաքաղաք ժամանող քաղաքացիներին»,-պարզաբանում է քաղաքապետարանը։
Նշենք, որ WYG-ը բրիտանական խորհրդատվական ընկերություն է, որն առաջարկում է մի շարք ծառայություններ տարբեր ոլորտներում՝ ներառյալ ճարտարագիտական, բնապահպանական և կառավարման խորհրդատվություն:
Ընկերությունը կենտրոնացած է համալիր նախագծերի լուծումներ տրամադրելու վրա, որոնք հաճախ ներառում են ենթակառուցվածքներ, շինարարություն և զարգացում: