Հայաստանի Հանրապետության Ազգային ժողովում Արսեն Թորոսյանին կփոխարինի Էսթեր Այվազյանը։ Այս մասին հայտնում են Կենտրոնական ընտրական հանձնաժողովից։
«Կենտրոնական ընտրական հանձնաժողովը օգոստոսի 27-ին ստացել է ԱԺ նախագահի արձանագրությունն առ այն, որ պատգամավոր Արսեն Թորոսյանի լիազորությունները վաղաժամկետ դադարել են։
Հանձնաժողովն օգոստոսի 29-ի հերթական նիստում լիազորությունները վաղաժամկետ դադարած պատգամավորի մանդատը տվել է «Քաղաքացիական պայմանագիր» կուսակցության ընտրական ցուցակի առաջին մասի հերթական հաջորդ թեկնածու Էսթեր Գագիկի Այվազյանին»,- նշված է ԿԸՀ-ի տարածած հաղորդագրության մեջ։
Ավելի վաղ հայտնել էինք, որ վարչապետ Նիկոլ Փաշինյանի առաջարկով և նախագահ Վահագն Խաչատուրյանի հրամանագրով Արսեն Թորոսյանը նշանակվել է ՀՀ աշխատանքի և սոցիալական հարցերի նախարար։