Հայաստանի անկախությունը և Հայաստանի ինքնիշխանությունը քննարկման ենթակա չեն. Ալեն Սիմոնյան

Արցախին վերաբերող բոլոր հարցերը նախևառաջ քննարկվում են Արցախի իշխանությունների հետ: Այս մասին լրագրողների հետ ճեպազրույցում հայտնեց ԱԺ նախագահ Ալեն Սիմոնյանը:

«Որոշում կայացնելիս նախապատվությունը տրվում է Արցախի ընտրված իշխանությունների կարծիքին»,- ասաց Սիմոնյանը:

Պատասխանելով ստորագրվելիք հնարավոր փաստաթղթի վերաբերյալ հարցին՝ Սիմոնյանը պատասխանեց.

«Գոյություն չունի նման փաստաթուղթ, գոյություն չունի օրինակ, որի մասին ես կարող եմ խոսել: Միևնույն ժամանակ, եկեք մի բան ֆիքսենք. ՀՀ-ն երբևէ տարածքային պահանջներ չի ունեցել իր հարևան երկրներից: Խոսքը Հայաստանի և Ադրբեջանի միջև խաղաղության պայմանագրի մասին է: Չեմ կարծում, որ «Արցախ» բառը պետք է և կարող է լինել Հայաստանի և Ադրբեջանի միջև կնքվելիք խաղաղության պայմանագրի մեջ»:

Լրագրողների դիտարկումներին՝ արդյոք Ռուսաստանը ցանկանո՞ւմ է, որ Հայաստանը դառնա Միութենական պետության կամ Ռուսաստանի մաս, Սիմոնյանը պատասխանեց, որ նման խոսակցություն չկա, իր համար չի էլ կարող լինել:

«Հայաստանի անկախությունը և Հայաստանի ինքնիշխանությունը քննարկման ենթակա չեն»,- ընդգծեց Սիմոնյանը:

Սիմոնյանը բացառեց, որ նման խոսակցություն կարող է լինել, իսկ ինքը չիմանա:

ԱԺ նախագահն անդրադարձավ նաև հարցին, թե չի՞ պատրաստվում արդյոք Հայաստանը դուրս գալ ՀԱՊԿ-ից:

«Շատ հնարավոր է, որ ՀԱՊԿ-ը որոշում կայացնի դուրս գալ Հայաստանից, որովհետև եթե այդ կառույցը պատշաճ արձագանք չի տալիս, ես մնում եմ իմ կարծիքին, որ մենք պետք է շատ երկար մտածենք և հասկանանք: Բայց, միևնույն ժամանակ, սա խաղ ու պար չէ, որ մենք կտրուկ շարժումներ անենք՝ առանց հասկանալու՝ հետո ինչ ենք անելու, և ինչ է դրան հետևելու»,- ասաց ԱԺ նախագահը:

Related posts

Իմ դիրքորոշումը հստակ է՝ կլինի սուր, բայց կանոնավոր բառապաշարով քննադատություն, կվարվեմ նույն կերպ, կլինի հարգանք՝ կարձագանքեմ հարգանքով․ վարչապետ

Տպավորություն է՝ միջպետական հարաբերությունները փչացնելու հատուկ քայլեր են արվում․ Կիսելյովը՝ «Սպուտնիկ Ադրբեջան»-ի աշխատակիցների ձերբակալման մասին

«Ոչ մի օգուտ չկա հակակարկտայինից»․ այգեգործը պետությունից նոր լուծումներ է ակնկալում