Կրետե կղզու հարևանությամբ գտնվող Գավդոսում անօրինական միգրանտներ տեղափոխող նավ է շրջվել։ Նախնական տվյալներով՝ 1 մարդ զոհվել է, 40-ը համարվում է անհետ կորած։
Ինչպես հայտընել է հունաստանի ERTNews հեռուստաընկերությունը, դեպքը տեղի է ունեցել դեկտեմբերի 14-ի վաղ առավոտյան։
Դեռևս անհայտ պատճառներով շրջված նավում գտնվողներից 37-ը փրկվել են:
Փրկարարական աշխատանքներում ներգրավված է առափնյա պահպանության երկու նավ, Հունաստանի ռազմաօդային և ռազմածովային ուժերի մեկական ուղղաթիռ։
Գավդոս կղզուց 40 ծովային մղոն հարավ նկատվել է մեկ այլ նավ, որում 47 միգրանտ է եղել։ Նրանց կյանքը նույնպես վտանգված է եղել, սակայն փրկարարները կարողացել են բոլորին ապահով հասցնել Պալեոխորա նավահանգիստ։