Ֆրանսիայի նախագահ Էմանուել Մակրոնն անդրադարձել է Ալյասկայում Պուտին-Թրամփ հանդիպման վերաբերյալ եվրոպացի առաջնորդների և Ուկրաինայի նախագահի հետ քննարկումներին: Նա նշել է, որ կարևոր է շարունակել աջակցել Ուկրաինային և ճնշում գործադրել Ռուսաստանի վրա այնքան ժամանակ, քանի դեռ չի հաստատվել կայուն և տևական խաղաղություն՝ հիմնված Ուկրաինայի իրավունքների հարգման վրա:
«Մենք միակարծիք ենք, որ ցանկացած հարատև խաղաղություն պետք է ուղեկցվի անվտանգության անսասան երաշխիքներով: Ես ողջունում եմ այս հարցում աջակցելու՝ ԱՄՆ-ի պատրաստակամությունը»,- X-ի իր էջում գրել է Մակրոնը:
Նա հավելել է, որ կշարունակեն համագործակցել Դոնալդ Թրամփի և Վոլոդիմիր Զելենսկու հետ:
«Ֆրանսիան շարունակում է ամուր կանգնած մնալ Ուկրաինայի կողքին»,- նշել է Մակրոնը։