Կատարի մայրաքաղաք Դոհայում պայթյունների ձայներ են լսվել։ ՏԱՍՍ-ի թղթակցի հաղորդմամբ՝ ԱՄՆ դեսպանատունը Կատարում կոչ է արել երկրում գտնվող ամերիկացիներին որպես նախազգուշական միջոցառում ապաստանել մինչև հետագա ծանուցումը։ Axios լրատվամիջոցի լրագրող Բարաք Ռավիդը՝ հղում կատարելով իսրայելական աղբյուրին, հայտնել է, որ Իրանը արձակել է վեց հրթիռ Կատարում տեղակայված ԱՄՆ-ի ռազմաբազաների ուղղությամբ։
Իրանի պետական հեռուստառադիոընկերությունը հաղորդել է, որ Թեհրանը սկսել է ռազմական գործողություն՝ թիրախավորելով Կատարում գտնվող Ալ Ուդեյդ ռազմաբազան։ Միաժամանակ կան հաղորդումներ, որ Իրանը հրթիռներ է արձակել նաև Իրաքում տեղակայված ամերիկյան ուժերի ուղղությամբ։
Իրանի նախագահ Մասուդ Փեզեշքիանն ավելի վաղ հանդես է եկել հայտարարությամբ՝ նշելով․
«Մենք չենք սկսել այս պատերազմը և չենք ձգտել դրան, սակայն չենք թողնի, որ մեր երկրի նկատմամբ իրականացված ագրեսիան մնա անպատասխան։ Մենք ամբողջ էությամբ կպաշտպանենք այս թանկ հայրենիքի անվտանգությունը և հավատով, իմաստությամբ ու վճռականությամբ կպատասխանենք Իրանին հասցված յուրաքանչյուր վերքի»։