Թաիլանդը մեղադրել է Կամբոջային՝ երեկ Մալազիայի և Միացյալ Նահանգների միջնորդությամբ ձեռք բերված հրադադարը խախտելու համար: Երկրի զինված ուժերի տվյալով՝ կամբոջական զորքերը թիրախավորել են Թաիլանդի մի քանի շրջան:
«Սա հրադադարի միտումնավոր խախտում և փոխվստահությունը խաթարելու փորձ է։ Ստիպված ենք արձագանքել՝ իրացնելով ինքնապաշտպանության մեր իրավունքը»,- հայտարարել է թաիլանդական բանակը։
Բանգկոկից նաև նշել են, որ Կամբոջան երկու անգամ հետաձգել է կողմերի ռազմական շրջանների հրամանատարների հանդիպումը, որը նախատեսված էր հուլիսի 29-ի առավոտյան։
Այնուհանդերձ, Կամբոջայի ազգային պաշտպանության նախարարությունը հերքել է Թաիլանդի մեղադրանքները։ Կառավարության ղեկավարը տեղեկացրել է, որ կեսգիշերին հրադադարն ուժի մեջ մտնելուց հետո «առաջնագծում իրավիճակը կայունացել է»։
Հիշեցնենք՝ Թաիլանդի և Կամբոջայի միջև սահմանի վիճելի հատվածում անցած շաբաթ սկսված բախումների հետևանքով զոհվել է առնվազն 38 մարդ, մոտ 300 000-ը տարհանվել է։