Հուլիսի 22-ի լույս 23-ի գիշերը ուկրաինական անօդաչու թռչող սարքերը հարձակվել են ՌԴ Ռոստովի մարզի Նովոչերկասկ և Շախտի քաղաքների վրա, հարձակման հետևանքով վիրավորվել է երեք մարդ՝ գրում է BBC-ն։
Ուկրաինայի իշխանությունները հաստատել են Նովոչերկասկի վրա հարձակումը՝ հայտարարելով, որ հարվածել են «երկաթուղային ենթակառուցվածքին, որն օգտագործվում է Ռուսաստանի ռազմարդյունաբերական համալիրի և բանակի համար»: Նրանք հստակեցրել են, որ «այդ լոգիստիկ կենտրոնը միացնում է ռազմավարական ուղղությունները՝ Դոնի Ռոստովը, Վորոնեժը, Վոլգոգրադը, Կամենսկ-Շախտինսկին։ Հենց այդ հանգույցի միջոցով է իրականացվում սարքավորումների, զինամթերքի, վառելիքի և անձնակազմի տեղափոխումը Ուկրաինայի հետ սահման»:
Նովոչերկասկում են տեղակայված նաև Ռուսաստանի Հարավային ռազմական շրջանի լոգիստիկ ստորաբաժանումները, որոնք պատասխանատու են զենքի և վառելիքի բաշխման համար։
Գիշերն անօդաչու թռչող սարքերի հարձակման է ենթարկվել նաև ուկրաինական Կրիվոյ Ռոգը: Քաղաքի մի քանի վայրերում հրդեհներ են բռնկվել, վնասվել են բնակելի շենքեր, ուսումնական հաստատություն և եկեղեցի, տուժածներ չկան, հայտարարել են իշխանությունները։
Ուկրաինայի ռազմաօդային ուժերն էլ հայտնել են, որ երեքշաբթի վթարի է ենթարկվել Ֆրանսիայից ստացած Mirage-2000 կործանիչը, օդաչուին հաջողվել է փրկվել։
Ուկրաինայի ռազմաօդային ուժերից հայտնել են, որ թռիչքային առաջադրանք կատարելիս ինքնաթիռի սարքավորումները խափանվել են, գետնի վրա զոհեր չկան, ավիավթարի պատճառները պարզելու համար ստեղծվել է հատուկ հանձնաժողով։