NASA-ի «Օրիոն» տիեզերանավը՝ «Արտեմիս-2» առաքելության անձնակազմով, հաջողությամբ վերադարձել է Երկիր՝ ավարտելով ավելի քան 50 տարվա ընթացքում առաջին մարդատար թռիչքը դեպի Լուսին և հետ։ Կապսուլան վայրէջք է կատարել Կալիֆորնիայի ափերի մոտ՝ մթնոլորտ մտնելով մոտ 40 հազար կմ/ժ արագությամբ։ Մթնոլորտով անցումն ու իջեցումը տևել են մոտ 13 րոպե՝ հայտնում են NASA-ից։
Անձնակազմի վերադարձը սկսվել է ծառայողական մոդուլի անջատմամբ՝ Երկրի մթնոլորտ մուտքից մոտ 25 րոպե առաջ։ Այդ մոդուլը ամբողջ տասօրյա առաքելության ընթացքում ապահովում էր անձնակազմի կենսագործունեությունը։
Լուսնից վերադարձի ժամանակ «Օրիոն»-ը մթնոլորտ է մտել մոտ 40 հազար կմ/ժ արագությամբ, ինչը համադրելի է 1960-70-ականների «Ապոլոն» ծրագրի առաքելությունների ցուցանիշների հետ։ Այսպիսի արագությունների դեպքում նույնիսկ թռիչքային ուղեգծի ամենափոքր սխալը կարող է ճակատագրական լինել։