Միացյալ Նահանգները հայտարարել է Ուկրաինային 400 միլիոն դոլարի օգնության նոր փաթեթ տրամադրելու մասին: Դրանում ընդգրկվում են ՀՕՊ-ի համար զինամթերք, հրետանային արկեր, զրահատեխնիկա, հակատանկային միջոցներ, ավիացիայի համար մարտավարական նավիգացիոն TACAN համակարգեր և այլ սարքավորումներ:
«Ուկրաինայի ժողովուրդը շարունակում է խիզախորեն պաշտպանել իր երկիրը ռուսական ագրեսիայից, մինչդեռ Ռուսաստանը շարունակում է իր անընդմեջ և դաժան հարձակումները՝ սպանելով Ուկրաինայի խաղաղ բնակիչներին և ոչնչացնելով քաղաքացիական ենթակառուցվածքները»,- ասվում է ԱՄՆ պետքարտուղար Էնթոնի Բլինքենի հայտարարության մեջ, որը հրապարակվել է երեքշաբթի։
Փաթեթը, որի մասին հայտարարվել է հուլիսի 25-ին, արդեն 43-րդ օգնությունն է Կիևին ԱՄՆ պաշտպանության նախարարության պաշարներից։ Միացյալ Նահանգները բազմիցս ընդգծել է, որ իր դաշնակիցների և գործընկերների հետ միասին կաջակցի Ուկրաինային այնքան, որքան անհրաժեշտ կլինի։